ZODIACO NAPOLETANO

L'oroscopo del Vesuvio del mese di Settembre 2008

23 August 2008, 22:14:30 • Oroscopo

O R O S C O P O N A P O L E T A N O

ASTROLOGIA

'O zodiaco
d' 'o blogantropo

caratteristiche
dei segni zodiacali

OROSCOPO
NAPOLETANO
DEL MESE

Marzo 2008

Aprile 2008

Maggio 2008

Giugno 2008

Luglio 2008

Agosto 2008

Ottobre 2008

OROSCOPO SETTEMBRE 2008

• Ariete • Toro • Gemelli • Cancro
• Leone • Vergine • Bilancia • Scorpione
• Sagittario • Capricorno • Acquario • Pesci

Ariete

20 marzo ~ 19 aprile
'O cielo e Settembre, pe' ll'Ariete e' 'nu poco griggio. 'E ccose nun vanno troppo bbone e state 'nu poco nervuse, pircio' vedite e nun ve 'a piglia' cu 'e cumpagne vuoste pecche' lloro nun teneno colpa e niente. 'O Sole, doppo 'o 21, pe' ve fa n'atu dispietto lassa 'a Vergine e se va a mettere dint' 'a Bbilancia, e pe' vvuje e' n'ata mazzata 'ncapa.
Pure si nun e' rrobba vosta, vedite e tenè 'nu poco e pacienza. Gruosse prubblemi 'e salute nunn' 'e tenite pero' arriguardateve 'o stesso.
Cu' ll'ammore nun facite tanto 'e gualluzzielle (galletti), avasciate 'nu poco 'a cresta, sinno' currite 'o rischio e v'appicceca' cu' 'o cumpagno o 'a cumpagna vosta.
Chiste so' 'e nummere vuoste: Tre, vintuno e vintinove, pero' nun v' 'e ghjucate pecche' tanto, 'stu mese nun jesceno.

Toro

20 aprile ~ 20 maggio
'O Sole è pusitivo pe' vintuno juorne, e pure chilli pianeti ca 'nce girano attuorno nun ve daranno assaje fastidio. 'A ripresa d' 'o lavoro v' ha fatto scurdà 'e prubblemi passati. Faciteve 'stu mese cu ll'animo qujeto, ca 'o ppeggio è passato. Settembre è pusitivo pure pe' studienti, ca ponno accummincià 'a scola cu' cchiù serenità.
Nun pazziate c' 'a salute e state a sentì 'e cunzigli ca ve dà 'o miedeco vuosto. Pure si tenite nu' poco 'e reffreddore, vedite 'e seguì cu' pacienza 'a terapia.
'O rapporto cu 'o cumpagno o 'a cumpaga vosta è comme piace a vuje: Stabbile e duraturo. Pirciò mettiteve tranquilli e "nun rumpite 'o sciamarro" ("piccone" non picconate con la gelosia)
Pe' vvuje 'nce stanno 'sti tre nummere: Otto, sirece, e uttantuno.

Gemelli

21 maggio ~ 20 giugno
Marte, Mercurio e Venere ve stregneno cu' 'nu sulo abbraccio. Forse 'a vvuje nun ve pare vero, ma 'a verità è ca 'stu mese tenite 'o core dint' 'o zucchero. Pe' vvuje s' avverano chilli suonne ca teniveve astipate. Arriveranno 'e ssuddisfazioni p' 'o lavoro, 'a salute e l'ammore. P' 'a fine d' 'o mese po' 'e ccose vanno ancora meglio, sarrà comme si sparasseno 'e "bbotte 'e S. Gennaro" (fuochi artificiali).
'E nummere vuoste so': Uno, diciannove e vinticinche.

Cancro

21 giugno ~ 22 luglio
Si tenite astipato 'nu poco 'e pacienza e buonumore, è venuto 'o mumento e ll'ausà. Pare ca tutte 'e pianeti se songo alliati tra lloro pe' ve fa 'nu dispietto. Nun facite discussioni 'ncoppo 'o posto 'e lavoro e vedite e nun cuntrarià 'o capo vuosto. Tenite mmano fino a quanno 'e ccose nun migliorano. Menumale ca 'a salute è stabbile e nun ve da gruosse prubblemi.
N' 'a chiacchiera c' 'o partner ve fa arraggià 'nu poco, e si nun ve facite piglià dd' 'e turche, pure 'sta situazione, 'a 'nu poco 'a vota, s'arrisolve.
Si proprio avite 'a jucà, allora pe' vvuje 'nce stanno: Tridece, sissanta e uttanta.

Leone

23 luglio ~ 22 agosto
Menumale ca so' cagnate 'e ccose. Putite finalmente accummincià a sta qujeti c' 'a capa. 'E prubblemi ca 'nce so' stati 'o mese passato l'avite superati, mò v'aspetta 'nu mese chino 'e suddisfazzioni e felicità, e si state penzanno 'a 'na decisione 'mpurtante, chisto è 'o mumento bbuono p' 'a putè piglià.
Nun abbusate d' 'a rrobba fritta sinnò ve se 'ngrossa 'o fegato.
'Nu viaggio ve farà cunoscere ggente nova, e chi nun tene ancora 'a catena 'o core, ampressa trova ll'ammore d' 'a vita soja.
'E nummere bbuone so': Ddoje, quatte, e sissantotto.

Vergine

23 agosto ~ 22 settembre
'O Sole v'accumpagna fino 'o 21 e po' ve lassa, pirciò apprufittatene. Guditeve 'nu poco 'a vita e nun ve lamentate d' 'o ssupierchio comme facite sempe, ma accuntentateve e chello ca 'a natura ve regala.
'O lavoro va bbuono e 'a salute pure, però 'nu poco 'e ginnastica 'a matina ve farà accummincià meglio 'a jurnata.
Pe' chi tene 'a famiglia, chisto è 'nu mese sereno e tranquillo.
Chiste so' 'e tre nummere pe' vvuje: Quinnece, trentuno e nuvanta.

Bilancia

23 settembre ~ 22 ottobre
Marte, Mercurio e Venere stanno dinto 'o segno vuosto. Doppo 'o vinte 'e Settembre però, Venere ve lassa, e lascia 'o spazzio a 'o Sole ca vo' trasere 'e preputenza dint' 'a Bbilancia, e cu 'sti tre pianeti ca tenite 'ncoppo 'a capa nun ve ferma cchiù nisciuno. 'A dinamicità e 'a 'ntelliggenza so' ll'arma segreta vosta. 'Stu mese, una ne facite e cient'ate ne pensate.
Si nun tenite ancora 'o partner, nun ve preoccupate, ca c' 'o fascino ca tenite 'sto mese, ne truvate a centenare.
'E nummere l'avisseve da' vuje, ma si nun 'e tenite, 'nce stanno chisti cca': Unnece, trenta e sittantotte.

Scorpione

23 ottobre ~ 22 novembre
'A tranquillità d' 'o Sole e 'a pacatezza 'e Giove, ve 'nfondono pace e serenità. Ve fanno addiventà addirittura cchiù saggio, e chi ve sta avvicino se stupisce pe' comme riuscite a dimustrà 'a 'sperienza e l'equilibbrio.
'Ncoppo 'o lavoro 'nce starranno nuvità, ma vuje 'e sapite affruntà cu' ffermezza e decisione, raggiungendo risultati ca faranno ascì 'a mmiria da' 'e culleghi vuoste.
Si tenite quacche dubbio parlatene c' 'o partner vuosto ca ve po' da' 'na mano.
Si vulite fa 'na puntata piccerella jucateve: Nove, sissantanove e sittantaquatte.

Sagittario

23 novembre ~ 21 dicembre
Tenite 'e tre moschettieri, Marte, Mercurio e Venere ca ve pruteggeno e ve regalano ll'ammore. 'Nce sta sulo 'nu poco 'o Sole ca se mette 'e travierzo e ve fa sentì 'nu poco 'nzuddisfatto, ma nonostane chesto, tenite 'a pussibbilità d' ottenè buoni risultati 'ncoppo 'o lavoro, riuscenno a organizzà 'nu prugetto p' 'o futuro.
Si tenite 'o core libbero, sarrà ancora pe' poco pecchè chisto è 'nu mumento bbuono pe' putè truvà ll'anima gemella.
Sette, diciotto e vintotto ponno essere 'e nummere ca ve fanno vencere.

Capricorno

22 dicembre ~ 20 gennaio
A vvuje 'o Sole v'accumpagna fino 'o vintuno 'e Settembre, po' v'abbandona comme già hanno fatto ll'ati pianeti.
Nun ce penzate pecche 'nce sta Giove ca ve segue, ma si avita piglià 'na decisione facitelo cu' calma e ponderazione.
Chiste, pe' vvuje è 'nu mese e passaggio ca nun ve porta cose bbone ma manco malamente. Ogni tanto cuntrullate 'a pressione e si 'o miedeco ve prescrive 'nu poco e riposo, statelo a sentì.
Pure cu ll'ammore vale 'a stessa cosa, pirciò vedite e nun lassà 'a via vecchia p' 'a nova.
'E nummere vuoste so': Durece, trentatree sittantacinche.

Acquario

21 gennaio ~ 19 febbraio
Mercurio, Marte e Venere dint' 'a bilancia ve danno finalmente 'na bbona dose 'e buonumore. Doppo 'o mese 'e Agosto, ca è stato 'nu poco scumbinato, nun ve pare vero ca 'e ccose so' cagnate. 'Stu mese 'nce sta 'a pussibbilità e 'na trasuta 'e solde, ca nun fanno maje male. 'O rapporto cu' ll'amici è cchiù sereno, e pure c' 'a famiglia, si 'nce stata 'na cuntrarietà, chianu chiano s'arrisolve.
'Nu viaggio ve farà 'ncuntrà 'na perzona ca po' pe' vuje addiventerà 'mpurtante.
Jiucateve: Vinte, sissantacinche e uttantacinche.

Pesci

20 febbraio ~ 19 marzo
Dint' 'a primma mmità d' 'o mese 'e Settembre 'o Sole ve po' causà 'nu poco 'e fastidio, mentre tutte ll'ati pianeti fanno p' 'a vvede' ca vuje nun esistite. Chi è 'mpiegato dint'a ll'ufficio, o sta accumincianno 'nu lavoro nuovo, s'adda sta accorte d' 'e culleghe 'nu poco mmiriuse. Sarrà comunque 'o principio 'e n'autunno assaje tranquillo. 'A siconda mmità d' 'o mese 'e ccose vanno a migliorà, pirciò si avite a fa' coccosa 'e 'mpurtante, astipatavella cu' pacienza, e vedite ca 'e frutte 'e cuglite primma o poi.
Pure cu' ll'ammore avite fa attenzione, nun cercate 'e nnuvità e teniteve astritto chello ca già tenite.
'E tre nummere vuoste so' chisti ccà: Quattuordece, quarantuno e cinquantaquattro

blogantropo

gennaro langella

Il mio blog..